A hithau'n Sul cyntaf yn Adfent ddydd Sul diwethaf dwi'n dechrau tyneru yn fy agwedd tuag at yr holl siopau a'r sefydliadau hynny sydd wedi hen godi eu coed Nadolig a gosod yr addurniadau yn eu lle. Buaswn i wrth fy modd petai'r hen draddodiad o aros tan y Nadolig ei hunan a dathlu am ddeuddeg diwrnod wedyn yn dal mewn lle, ond mae'n rhaid imi wynebu realiti cyfalafiaeth ryngwladol sydd am i bawb brynu cyn y Nadolig, ac wedi'r Nadolig hefyd os yw hynny'n bosib.Wedi gwasanaeth Cymun Bendigaid am 10 o'r gloch y bore roeddwn wedi addo mynd i stiwdio'r BBC er mwyn recordio pwt ar gyfer rhaglen deyrnged i Alun Creunant Davies i'w darlledu ddydd Sul sy'n dod. Felly yn hytrach na dychwelyd yn ôl i'r dref fe benderfynais gymryd cinio yng Nghanolfan y Celfyddydau. Roedd y cinio yn iawn, powlenaid o gawl llysiau llenwol a brechdan a choffi. Wedyn y cyfle i grwydro o gwmpas y "ffair grefftau" sy'n rhan annatod erbyn hyn o'r Nadolig traddodiadol yn Aberystwyth. Fe alla' i addo un peth ichi, os ych chi eich hun yn fetistydd canhwyllau neu'n ffrind i rywun sydd yn ffetistydd canhwyllau yna'r ffair grefffau hon yw'r lle perffaith ichi brynu anrhegion Nadolig.
Mae'r Nadolig ar ei ffordd.
Rhagor o luniau o'r ffair grefftau.
Tagiau Technorati: Nadolig | Crefftau | Canhwyllau.
