Dechreuodd y penwythnos yn reit hamddenol gydag ymweliad â Thal-y-bont a chroeso hyfryd gyda GJ a FJ i gael swper o gawl. Cwrdd â'r teulu i gyd am y tro cyntaf a chael amser i glywed un o'r cystadleuwyr yn eisteddfod gylch yr Urdd yn y Borth drannoeth cyn mynd mas i'r Llew Gwyn.Fan'ny roedd 'na dyrfa dda yn ein disgwyl. Ac fel arfer roedd 'na hwyliau da yno gyda phawb yn cystadlu gyda brwdfrydedd ac felly yn gwneud gwaith y cwisfeistr yn ddigon hawdd. Chwe rownd i gyd. Gan gynnwys rownd ar ddiarhebion. Beth am roi tro arni? Pa ddiarhebion yw'r rhain?
1. N A R M A
2. G Y G Y F E Ch
3. N A Y P M
4. Y Ng S M C B
5. A Dd W A Dd F
6. C G N C W A M
7. M G M D
8. A O U A H I U
9. Rh C C C
10. T G N A
11. G A M Ll N D M Ll
12. G A A D
13. T E T A
14. H N Dd E H
15. T M N Th E G
Dwi'n credu imi fod yn ddoeth iawn i gynllunio'r cwis fel bod fy mos newydd a'i dîm yn ennill. Wedi'r cwis cyfle i siarad cyn mynd 'nôl i'r dref. Roeddwn i wedi bwriadu cymryd bws yn ôl, ond yn y diwedd dyma FJ yn cynnig rhoi lifft imi. Ond fel roedd hi'n digwydd roedd yn rhaid i EG fynd i mewn ac fe gefais gyfle am sgwrs gyda hi. Cyfle i longyfarch y Lolfa ar gael cynifer o'u llyfrau ar restr fer hir Llyfr y Flwyddyn a drefnir gan Academi. Fe wnes i fentro dweud fy mod i'n meddwl fod nofel Caryl Lewis, Martha, Jac a Sianco yn haeddu ennill, er bod 'na lyfrau eraill diddorol iawn ar y rhestr.
