Rhai sylwadau am fywyd a phethau eraill gan dderwydd o Aberystwyth, Ceredigion.
I'm a Celtic druid from Aberystwyth, Wales and my blog is entirely in Welsh. Thanks for visiting.

2006-06-21

Cartref newydd Blog Dogfael

Mae Blog Dogfael wedi symud i gartref newydd. Os ydych chi am ddilyn yr hyn sy'n digwydd i Dogfael ewch i http://www.blogdogfael.org.

Blog Dogfael has moved to a new home. If you've been popping in here to keep up with things then you need to go to http://www.blogdogfael.org.

Michael Owen a Lloegr

Michael OwenGêm gyfartal 2-2 gafodd Lloegr gyda Sweden neithiwr. Felly mae Lloegr wedi mynd i'r rownd nesaf ar ben y grŵp ac yn dod wyneb yn wyneb â thîm Ecuador. Fe gafodd Michael Owen ei gario o'r cae wedi anaf. Roedd yn edrych mewn poen ofnadwy, roeddwn i'n gwingo mewn cydymdeimlad. Wedyn wrth i mi ystyried un neu ddau o bethau, fe sylweddolais petai Michael Owen heb heb droi ei gefn ar ei wlad ei hun er mwyn chwarae i Loegr, yna ni fuasai wedi dioddef yr anaf a gafodd. Wrth gwrs, er mwyn osogi'r anaf, ni fuasai'n chwarae yn rowndiau terfynol Cwpan y Byd 2006 chwaith, ond pris bach fuasai hynny i'w dalu!

Tagiau Technorati: | | .

Ta ta Top of the pops

Patti Smith
Patti Smith gan Robert Mapplethorpe
Ar ôl rhyw ddeugain mlynedd mae'r BBC wedi penderfynu fod y rhaglen Top of the pops yn mynd i ddod i ben ddiwedd Gorffennaf. Fel rhywun sydd yn tristáu oherwydd dylanwad diwylliannol y byd Eingl-Americanaidd fe ddylen i fod yn llawenhau oherwydd hyn - un cyfrwng yn llai er mwyn mogi diwylliant pawb arall! Ond fedra i ddim gwneud hynny gan fod Top of the pops wedi bod yn rhan annatod o fy ieuenctid. Am ryw chwe mlynedd o 1974 (buddugoliaeth Abba yn yr Eurovision) ymlaen bu'r rhaglen yn rhan o fy myd 'go iawn'. Ar yr un pryd yn gywir yn fy mydysawd cyfochrog roeddwn i'n gwylio Disg a dawn a Twndish ac yn dilyn grwpiau fel Edward H. Dafis ac yn ddiweddarach Geraint Jarman a'r Cynganeddwyr.

Poster Edward H DafisI ddweud y gwir canu poblogaidd Cymraeg a'm gwnaeth i'n ymwybodol o fyd mawr canu poblogaidd Eingl-Americanaidd. Fel dilynwr selog i Edward H. Dafis roeddwn i'n clywed aelodau'r grŵp hwnnw yn sôn am y dylanwadau arnynt ac yn gwneud i grwt bach chwilfrydig o Fynachlog-ddu fod am wybod mwy. Heblaw am gylchgrawn Jackie fy chwaer yr unig ffynhonnell arall oedd Top of the pops. Yn ddiweddarach, dwi'n falch o gael dweud, fe ddechreuais i danysgrifio i'r New musical express.

Fe ddaeth fy niddordeb mewn canu Eingl-Americanaidd i'w ben-llanw yn 1978 pan fues i yn y Reading Rock Festival y flwyddyn honno - ar ôl bod yn Eisteddfod Caerdydd, wrth gwrs. Roedd honno flwyddyn dda. Doedd yr ŵyl heb gyfyngu ei hun i grwpiau roc trwm ac felly fe gafwyd nifer o berfformwyr pync ar lwyfan. Dwi'n cofio The Jam, Status Quo, Lindisfarne, Albion Band (grŵp gwerin!) ac wrth gwrs, Patti Smith a oedd yn cael ei hadnabod fel 'prydydd pync' neu 'the poetess of punk'. On'd oedden nhw'n ddyddiau da!

Bryd hynny dim ond Top of the pops a'r Old Grey Whistle Test oedd cerddoriaeth roc gyfoes ar y teledu. Erbyn hyn mae 'na sianelau aneirif. Bydd yn drueni gweld Top of the pops yn diflannu, ond mae'r byd yn newid ac atgof fydd y rhaglen fel fy ieuenctid o fewn dim amser.

Dyma berfformiad gan y grŵp Queen ar raglen Top of the pops o 1974. Dychmygwch yr effaith gafodd teledu o'r fath ar deulu yn gwylio mewn tyddyn ar lethrau geirwon Preseli!



Tagiau Technorati: | | .

Cenedlaethol?

Arwydd, Y Lôn Gefn AberystwythFe welais i'r arwydd hwn ac fe wnaeth fy nharo i fod 'Cymru a Lloegr' bellach yn uned genedlaethol yn llygaid y gwasanaeth prawf! Mae'n mynd yn fwy ac yn fwy anodd bob dydd i'r rhai sy'n ceisio cynnal y muth 'cenedlaethol' Prydeinig - diolch byth!

Tagiau Technorati: .

2006-06-20

Gwibdaith i Ystad Ddiwydiannol Glanyrafon, Llanbadarn Fawr

Glanyrafon, Llanbadarn FawrBeth yw'ch syniad chi o wibdaith ar brynhawn dydd Sul? Castell, traeth, eglwys neu fynydd? Ddydd Sul diwethaf fe wnes i ac RO a DML ailddiffinio 'gwibdaith' i gynnwys taith o gwmpas ystad ddiwydiannol. Ar ôl cinio hyfryd yn nghfarn Ty'n-llidiart, Capel Bangor, fe wnaethon ni alw heibio i Ystad Ddiwydiannol Glanyrafon ar ein ffordd 'nôl i'r dref. Nid oedd tywysyddion ar gael yno i ddangos prif atyniadau'r lle i ni felly roedd yn rhaid inni helpu ein hunain. Fe welson ni ganolfan ddosbarthu Cyngor Llyfrau Cymru, Rachel's Dairy, canolfan gwaredu sbwriel Cyngor Sir Ceredigion, gweithdy cwmni theatr Arad Goch, a llu o ffatrïoedd, swyddfeydd, siopau a busnesau eraill. Fe ddylai Adran Dwristiaeth Llywodraeth y Cynulliad hybu'r fath hyn o dwristiaeth; dim ond ychydig fisoedd yn ôl fe fues i weld Amlosgfa Aberystwyth. Pan ddaw'r cyfle buasai'n dda ymweld â llefydd a sefydliadau eraill sy'n ein gwasanaethu ond yr ydym yn cerdded heibio heb feddwl edrych arnyn nhw.

Rhagor o luniau o Ystad Ddiwydiannol Glanyrafon, Llanbadarn Fawr.

Tagiau Technorati: .

2006-06-19

Baneri Lloegr yng Nghymru

Tŷ ym Mhont-goch, CeredigionAr fy nheithiau ddoe ac echdoe fe ddes i ar draws mwy o dystiolaeth i bresenoldeb cefnogwyr tîm pêl-droed cenedlaethol Lloegr yng Nghymru. Efallai yr esiampl fwyaf eithafol oedd tŷ ym Mhont-goch lle'r roedd pedair baner S. Siôr enfawr yn hedfan. Roedd 'na dai hefyd ym Mhenrhyn-coch a Llanbadarn Fawr lle'r oedd baner Lloegr yn 'chwifio' yn yr awyr iach. Nawr, fe alla i ddeall un faner, ond mae mwy nag un a'r rheiny yn rai mawrion yn fy nharo i fel rhyw fath o ddatganiad sydd â mwy o arwyddocâd iddo na dim ond dangos cefnogaeth i dîm pêl-droed.

Wedi hyn'na i gyd daeth y cyfle i wneud fideo byr o gar gyda baneri Lloegr yn gyrru trwy Gapel Bangor. Rydw i'n falch iawn o'r fideo hwn oherwydd mae'n anodd iawn sylwi ar bopeth wrth fynd heibio. Fe wnes i golli llun da o dŵ yn Llanbadarn Fawr a oedd yn gyforiog o faneri S. Siôr er imi fynd heibio dwywaith! Os bydd Lloegr yn cyrraedd rownd derfynol Cwpan y Byd 2006 yna fe fydd gen i gasgliad sylweddol iawn o effemera pêl-droed Seisnig yng Nghymru!

Rhagor o luniau o Loegr yng Nghymru.

Tagiau Technorati: Cwpan y Byd 2006 | | |

Noson fondue!

Cerddorion yn trafodDyw gwybod y bydd pawb yn dweud ei bod hi'n nodweddiadol o ddosbarth canol i Blaid Cymru Aberystwyth a Phenparcau drefnu noson fondue i godi arian. Ond byddwn i'n ymateb yn syth a dweud taw sefyll yn lle barbaciw oedd y fondue. Y drafferth gyda barbaciw yw ei bod yn rhaid ichi drefnu'r tywydd fis ymlaen llaw er mwyn ei gynnal yn llwyddiannus. Gellir sicrhau bod noson fondue yn mynd i fod yn sych! Ond mae'r elfen o fflamau ac o gogoinio pethau o flaen eich llygaid yn rhan o'r profiad fondue, felly mae'n medru gwneud y tro dros farbeciw yn iawn. Roedd ID a NMD wedi trefnu'r cwbl yn gampus ac roedd y bara a'r salad a'r fondue caws yn gwneud pryd blasus dros ben. Trueni nad oedd mwy yno, dim ond iddyn nhw gael blasu'r fodue caws hyfryd ... heb sôn am ein helpu ni i godi mwy o arian! Unwaith eto roedd IapD ac EG yn barod iawn i ganu eu hofferynnau - ffidil, sacsaffôn, ffliwt a bagbibau.

Mae unrhyw un sy'n f'adnabod i yn dda yn gwybod cymaint o ran y chwaraeodd fondue yn fy ieuenctid. Nid fy mod wedi gweld set fondue na'i flasu erioed ym Mynachlog-ddu; ond dyna oedd fy ffantasi parhaol ynghyd ag After Eights. Dyna oedd y 'lifestyle' yr oeddwn yn dewis i fi fy hun. Yn anffodus doedd dim ffordd o gwbwl i wireddu hynny. Roedd hi'n 1979 cyn imi flasu fy fondue cyntaf a hynny pan yn fyfyriwr yng Ngholeg Prifysgol Cymru, Aberystwyth. Dwi'n gwybod fod hyn'na yn gyfaddefiad ffogïaidd iawn i'w wneud - tra bod eraill yn arbrofi gyda phob mathau o gyffuriau oedd yn ehangu'r meddwl, roeddwn i'n arbrofi gyda chaws Gruyère a Emmental, kirsch a gwin gwyn!


Lawrlwytho'r ffeil

Rhagor o luniau o'r noson fondue.

Tagiau Technorati: | .

2006-06-14

Owain Glyn Dŵr

Cerflun Owain Glyn Dŵr, CorwenHeblaw am ei ddelw ar seliau nid oes gan neb unrhyw syniad o sut olwg oedd ar Owain Glyn Dŵr mewn gwirionedd. Ond mae gan ddigon o bobol syniadau am sut olwg ddylai fod wedi bod ar Owain Glyn Dŵr, ac nid yr hyn a ddychmygwyd gan y cerflunydd Simon van de Put yw hynny. Ar y sgwâr yng Nghorwen ar hyn o hryd saif cerflun hynod o'r tywysog fel dyn byr cyffredin sy'n debyg i'w gyd-wladwyr sy'n tyrru i'r dref fechan hon bob wythnos. Ond nid un fel 'na yw Glyn Dŵr i fod. Yn ôl gwefan newyddion BBC Cymru dyw pobol y dref ddim wedi hoffi'r cerflun ers ei godi yn 1995. Dywedodd un o aelodau'r cyngor cymuned: "Mae cerflun gwell mwy drudfawr, mwy tywysogaidd, yn mynd i ddod yn ei le a gobeithio y bydd yn plesio'r mwyafrif o bobl Cymru."

Dechreuodd hyn wneud imi feddwl am ba nodweddion a olygir wrth yr ansoddair 'tywysogaidd' gan fod tywysogion wedi dod mewn pob siap a lliw a llun dros y canrifoedd. Ai rhywun tal a golygus yw'r ystyr? Ai rhywun Sgandinafiadd yr olwg yn hytrach na Chymro byr boliog? Bydd y cerflun newydd yn costio rhyw £100,000. Mae'n rhaid i mi gyfaddef fy mod yn meddwl fod y cerflun persennol yn gwneud y gwaith yn iawn. Wrth herio'r confensiwn o sut y dylid cynrychioli tywysog mae'r cerflun yn llwyddo i'n gwneud ni i feddwl am Owain fel dyn yn ogystal â gwladweinydd ac arweinydd mewn rhyfel. Delwedd o dysywog democrataidd a geir yn y cerflun - yn wreiddiol yr oedd yn isel i lawr ar yr un lefel â phawb arall, ond bod yn rhaid ei osod yn uwch oherwydd ymosodiadau gan fandaliaid. Dyma dywysog ar raddfa ddynol. Dyma dywysog sy'n adlewyrchu ein profiad ni fel cenedl fechan mewn byd mawr. Mae lle i ofni fod eraill yn dymuno tywysog fydd yn 'ymerodraethol' ei olwg, yn adlewyrchu gwerthoedd gwahanol iawn i'r rhai yr ydym ni yn rhoi bri arnynt heddiw. Edrychaf ymlaen i weld beth fydd yn cymryd lle'r cerflun presennol, ond hoffwn i ddim gweld disodli gweledigaeth Simon van de Put yn llwyr.

Rhagor o wybodaeth am gerflun Simon van de Put.

Tagiau Technorati: | | .

Anrheg o Denerife

Beth fusech chi'n dod 'nôl fel anrheg i rywun o wyliau yng ngwladwriaeth Sbaen? Asyn yn gwisgo sombrero, lamp bwrdd ar ffurf menyw yn dawnsio fflamenco, neu ffotograff o Siop Spar? Rydych chi'n gwybod nawr beth ges i. Diolch GJ a FJ! Dwi'n gwerthfawrogi'r rhodd yn fawr iawn.

Siop Spar, Puerto de la Cruz, Tenerife

Rhagor o luniau o siopau Spar ar draws Ewrop.

Tagiau Technorati: .

Baner Lloegr yn y glaw

Echdoe fe gefais fy hun yn dilyn car yn chwifio baner Lloegr trwy ganol Aberystwyth. Roedd hi'n bwrw glaw. Dyma rannu'r profiad gyda chi. Hoffwn esbonio i bawb sy'n poeni am faterion iechyd a diogelwch nad fi oedd yn gyrru'r car oedd yn dilyn y car gyda baner Lloegr arno.


Lawrlwytho'r ffeil

Tagiau Technorati: | | .

Y disgwyliedig!

Os oedd agwedd gwraig y tacsi yn annisgwyl yna mae'r pwt hyn o'r Guardian heddiw yn gwbl ddisgwyliedig. Mae'n dod o erthygl o dan y pennawd "England fans warned against giving Nazi salutes in Nuremberg". Dwi'n rhyfeddu at ddiniweidrwydd plismyn bellach.
Yesterday German police officers handed out pocket guides to thousands of England fans telling them that goose-stepping and plastic helmets would be tolerated, while Nazi salutes and SS insignia would not. Assistant chief constable Stephen Thomas, the officer in charge of the British police operation in Germany, said he was "personally disappointed" that England fans continued to sing war songs. "I think they should show more respect to our hosts but if they are sung in good humour we have to accept them and hopefully our German hosts can see the humour," he said.


Tagiau Technorati: | | .

2006-06-13

Yr annisgwyl

Does dim sy'n well i'r ysbryd na chwa o awel iach yr annisgwyl. Nid sioc dwi'n cyfeirio ato, ond yr annisgwyl. Rhywbeth sy'n herio'ch disgwyliadau am berson neu sefyllfa arbennig. Cefais i'r profiad hwnnw gyda gyrrwr tacsi ddydd Sadwrn. Dwi'n gwybod nad oes neb sy'n fyw enwog am fod yn stereoteip na gyrrwyr tacsys. Mae eu profiad hir o ddarllen y Daily mail, Sun a'r Daily express ar y ranciau wedi pydru eu meddyliau i unffurfiaeth asgell-dde Prydeinig adweithiol. Felly dychmygwch y syndod o gael sgwrs am Gwpan y Byd a gobeithion Lloegr wnaeth orffen, "Let's hope they don't win. 'Cos if they do we won't hear the end of it." Gobeithio na chafodd ei siomi'n ormodol gan y canlyniad. Tra bo gyrrwyr tacsys fel 'na o gwmpas mae dal i fod rhyw obaith dros wareiddiad!

Tagiau Technorati: | | .

2006-06-12

"Mae llinell Aberystwyth yn un anodd"

Trên ArrivaStori yn y Western mail heddiw am y rheilffordd o Aberystwyth i Birmingham. Dyw cynnwys y stori ddim yn newyddion mewn gwirionedd, ond mae'n ddiddorol nodi fod hyd yn oed rheolwr newydd Trenau Arriva Cymru, Bob Holland, yn gorfod cyfaddef: "It's a difficult route. The long-term solution is working with Network Rail over the next two to three years, in the meantime it's always going to be difficult to maintain the reliability that we want." Mewn geiriau eraill mae'n mynd i fod yn ddwy os nad tair blynedd eto cyn bod y trenau yn rhedeg ar amser! Yn y cyfamser faint o arian cyhoeddus bydd y cwmni preifat yn ei lyncu wrth ddarparu gwasanaeth eilradd?

Tagiau Technorati: | | .

"Little Britain Cymraeg"

Dwi'n gwybod ei fod yn hen, ond o'r diwedd dwi wedi dod o hyd i'r blog y clywais sôn amdano beth amser yn ôl. Blog sy wedi mentro dychanu Dogfael! Da iawn Dwyn mae angen gwneud hynny o gofio'r holl ddoethinebu difudd dwi'n ei wneud. Pam fy mod i meddwl fod neb am glywed beth yw fy marn ar ddim byd, dwi ddim yn gwybod. Cofiwch taw therapi i fi yw hyn ac nid dim byd arall. Diolch i chi i gyd am fy helpu i oresgyn fy ngwendidau. Ond yn anffodus mae dychanu rhywun yn ffordd ychwanegol o fasajo ego rhywun, felly yn y pendraw fe wnaiff dim lles i mi o gwbwl.

Blog Dwyn.

Tagiau Technorati: | .

2006-06-10

Gŵyl Fawr Deddf Iaith Newydd


Pala yn canu ar ddechrau'r ŵyl

Fel y dywedais i roeddwn i mewn bydysawd cyfochrog ddoe. I mi nid Cwpan y Byd 2006 oedd y realiti, ond yn hytrach sefyllfa'r Gymraeg wrth imi fod yn un o'r cannoedd a ddaeth ynghyd yng Ngŵyl Fawr Deddf Iaith Newydd a drefnwyd gan Gymdeithas yr Iaith Gymraeg yn y Neuadd Fawr, Canolfan y Celfyddydau, Aberystwyth. Yr oedd y rali yn cychwyn am ryw 2.00pm a'r unig dro i'r byd mawr tu fas dorri ar ein traws oedd y waedd a glywyd o du'r bar rhyw bum munud yn ddiweddarach. Heblaw am hynny roedd pawb yn canolbwyntio ar yr alwad am ddeddf iaith newydd fuasai'n rhoi statws swyddogol i'r Gymraeg yng Nghymru.

Siwan Tomos, UMCA, yn siaradMae'r ymgyrch dros Ddeddf Iaith Newydd wedi bod yn un hir. Fe ddechreuodd yn union wedi gweithredu Deddf 1993, oherwydd erbyn i honno gyrraedd y llyfr statud a chael ei gweithredu yn gyflawn roedd sefyllfa'r Gymraeg a natur cymdeithas wedi newid yn fawr iawn. Yn 1993 prin oedd y bobol oedd wedi gweld y we fyd eang, erbyn heddiw mae'r rhyngrwyd yn rheoli ein bywydau bron â bod. Ond os geisiwch chi wasanaeth Cymraeg trwy'r we fyd eang gan adrannau'r Llywodraeth fe welwch yn gyflym iawn nad yw'r Gymraeg yn cael ei thrin 'yn gyfartal'. Felly roedd niefr o siaradwyr wedi dod ynghyd i wneud yr achos dros ddeddf a fuasai'n gwneud y Gymraeg yn iaith swyddogol yng Nghymru, ac yn datgan taw hi yw priod iaith ein gwlad.

Eileen Beasley yn gadael y llwyfanAr ddechrau'r prynhawn talwyd teyrnged i Eileen Beasley, gynt o Langennech, am ei hymgyrch arloesol, ynghyd â'i gŵr Trefor, i gael bil treth dwyieithog gan Gyngor Dosbarth Gwledig Llanelli. Dechreuodd ar ei hymgyrch yn 1952, roedd hi'n 1960 cyn i'r bil dwyieithog gyrraedd - erbyn hyn yr oedd y bwmbeli wedi bod yn ei chartref rhyw 14 o weithiau i atafaelu ei heiddo am wrthod talu'r biliau uniaith Saesneg. Dim rhyfedd iddi gael ei galw yn Rosa Parks Cymru. Ond yn eironig ddigon roedd protest Eileen wedi rhagflaenu Rosa Parks o dair blynedd ac mewn gwirionedd Rosa Parks ddylai fod wedi derbyn yr enw "Eileen Beasley" Alabama! Ond yr hyn sy'n torri fy nghalon i yw bod Rosa Parks wedi derbyn anrhydeddau lu am ei chyfraniad hi i ennill hawliau i Affro-Americaniad, tra bo Eileen Beasley ond wedi derbyn briwsion mewn cydnabyddiaeth. Ble mae'r strydoedd sydd wedi'u henwi ar ei hôl hi? Ble mae'r canolfannau cymdeithasol? Ble mae'r stampiau? Ble mae'r gwobrau? Ble mae'r llyfrau? Does dim byd o'r fath oherwydd bod brwydr Eileen yn dal i fynd yn ei blaen. Nid yw Llywodraeth y Cynulliad yn fodlon hyd yn oed ystyried gwneud y Gymraeg yn iaith swyddogol; "boring, boring, boring" oedd ymateb y prif weindiog, Rhodri Morgan.


Hywel Teifi Edwards yn annerch am werth y Gymraeg

Wedi cyflwyniad Hywel Teifi Edwards fe ddaeth y siaradwyr eraill ymlaen yn eu tro: Catrin Dafydd, Cymdeithas yr Iaith Gymraeg; Ieuan Wyn Jones, Plaid Cymru; yr Arglwydd Roger Roberts, y Dem Rhyddiaid; Siwan Tomos, Undeb Myfyrwyr Cymraeg Aberystwyth; Dilwyn Roberts-Young, Undeb Cenedlaethol Athrawon Cymru; a Gwyneth Morus Jones, Merched y Wawr. Siaradodd pawb yn dda iawn, heblaw am Roger Roberts oedd yn ymddangos nad oedd e wedi paratoi dim ymlaen llaw. Rhaid cyfaddef pan fo ymgyrch wedi bod yn mynd yn ei blaen ers cyhyd mae'n anodd dod o hyd i lawer o bethau newydd i'w dweud. Ond roedd pawb yn pwysleisio'r cyfleoedd sy'n codi i wneud rhywbeth creadigol gyda Llywodraeth y Cynulliad yn llyncu Bwrdd yr Iaith Gymraeg.

Pan ddaethon ni mas o'r cyfarfod fe glywson y newyddion mawr o'r byd 'go iawn'. Roedd Lloegr wedi ennill yn erbyn Paraguai o 1-0.

Rhagor o luniau o'r Wyl Fawr yng Nghanolfan y Celfyddydau, Aberystwyth.

Tagiau Technorati: | .

Bydysawd cyfochrog

Dwi ddim yn ddyn mawr am nofelau, ond mae 'na un categori dwi eithaf hoff ohonyn nhw, sef ffuglen bydysawd cyfochrog, neu yn Saesneg, 'parallel universe'. Mae'r Wikipedai yn disgrifo ffuglen bydysawd cyfochrog fel hyn, "Parallel universe or alternate reality in science fiction and fantasy is a self-contained separate reality coexisting with our own. This separate reality can range in size from a small geographic region to an entire new universe, or several universes forming a multiverse." Does dim rhaid iddyn nhw fod yn nofelau ffug wyddonol yn fy marn i. Ond y pwynt dwi am ei wneud y tro hwn yw fy mod yn aml iawn yn gweld byw fel Cymro Cymraeg ymwybodol a chenedlaetholgar yn eich gosod chi mewn bydysawd cyfochrog yn aml iawn iawn. Roedd heddiw yn ddiwrnod felly.

Tîm Paraguái

Yn y byd 'go iawn' roedd Cwpan y Byd 2006 yn mynd â sylw pawb, yn enwedig felly gêm Paraguái yn erbyn Lloegr. Yn fy myd 'go iawn' i roeddwn yn ymgyrchu dros barhad fy iaith, cenedl a'm hunaniaeth. Dwi'n teimlo fel un o frodorion de America yn aml iawn y dyddiau - pobol sydd bron wedi colli'r dydd, ond yn ddiweddar wedi gweld eu sefyllfa yn newid, fel yn achos Evo Morales. Os roedd Gŵyl Fawr deddf iaith newydd Cymmdeithas yr Iaith Gymraeg yn codi'r galon, yna mae'n rhaid imi fod yn onest a dweud bod sôn am Paraguái hefyd yn codi'r galon. Efallai eu bod nhw wedi colli'r gêm bêl-droed ond mae'r ffaith bod 90% o boblogaeth y wlad yn dal i siarad iaith frodorol Guaraní yn dangos nad oes raid i bethau fod fel y mae'r mwyafrif am iddyn nhw fod bob amser.

Tagiau Technorati: | | .

Baner S. Siôr


Dyw e ddim yn obseiswn ... eto! Mae 'na erthygl yn y Guardian heddiw yn sôn am bresenoldeb baner S. Siôr ar strydoedd Lloegr. Mae'n dechrau:
England looks like one giant George Cross. It's not just the myriad car flags and house flags flapping in the air. Even corporate logos appear to be burnished England red and white. HSBC, the Abbey, bus stops, phone boxes, no entry signs, L-plates, have all metamorphosed into George flags. Walk the streets, and you hear the same muttering. "What score?" "Where are you watching?" "I'm already sick of it."
Yn yr erthygl ddifyr dwi'n dysgu "Most of England and Wales' 77,595 prisoners are expected to watch the match. Only those in segregation will not have access to a TV." A dwi'n dechrau holi i fi fy hunan a fyddai gan y carcharorion Cymreig reswm dros fynd â'r llywodraeth i'r Llys Iawnderau Dynol ar sail eu bod yn gorfod dioddef triniaeth annynol, annarferol, a chreulon. A nodaf gyda diddordeb hefyd nad oes sôn am garcharorion yr Alban yn dioddef y fath driniaeth. A oes 'na bosibilrwydd fod carcharorion Cymru hefyd yn wynebu gwahaniaethu ar sail eu tarddiad cenedlaethol?

Tagiau Technorati: Cwpan y Byd 2006 | .

Penarth yn chwifio'r faner

LloegrBeth sy'n digwydd? Mae pobol yn dechrau cwyno o'r diwedd am chwifio baner Lloegr yng Nghymru ac mae'n troi yn ddadl. Yn ôl gwefan y BBC, dyna ddigwyddodd ym Mhenarth pan geisiodd crwt 11-mlwydd oed chwifio baner Lloegr o ffenest ei ystafell wely. Fe wnaeth un o'r cymdogion gwyno am hyn ac ar y cychwyn fe geisiodd y landlord gael y crwt i dynnu'r fflag. Ond yn y diwedd, i ddangos nad oeddent yn galon galed, fe roddwyd caniatâd iddo arddangos baner S. Siôr yn gyhoeddus. Yr hyn oedd yn ddiddorol iawn i mi oedd fod mam y crwt oedd am chwifio'r faner wedi defnyddio'r ddadl: "It's fun at the end of the day we are showing our support for the only British team left in there." Tybed petai pethau'n wahanol (breuddwyd ffŵl dwi'n gwybod), gyda Chymru drwodd i'r rowndiau terfynol a Lloegr heb lwyddo. A fyddai y ddraig goch yn chwifio dros fflatiau Essex? Dwi'n gobeithio y byddwn ni rhyw ddiwrnod yn medru profi'r ddamcaniaeth - felly er mwyn gwyddoniaeth fe fydd yn rhaid i Gymru ennill y tro nesaf ac yn anffodus bydd yn rhaid i Loegr golli. Mae hi ond yn deg inni fedru cynnal yr arbrawf hwnnw, bydd yn gyfraniad pwysig iawn i'n dealltwriaeth o beth yw 'Prydeindod' yn yr unfed ganrif ar hugain. Efallai y buasai Llywodraeth y Cynulliad yn fodlon ariannu'r peth fel rhan o'i hymgyrch i godi 'proffil' Cymru. Mae'n debyg y busai'r ddraig goch yn blastar ar dŷ William a Lesley yn Sunderland (uchod) petai cyfle i wneud yr arbrawf, ac fe allen ni ychwanegu un cam arall wedyn a gweld a fuasai'r cymdogion yn cwyno am faner Cymru fel y gwnaethon nhw am y baneri S. Siôr ac undeb!

Tagiau Technorati: | .

2006-06-09

Cwpan y Byd - Yr Almaen v. Costa Rica

"It's a party atmosphere, it's a carnival, the Germans have made everybody welcome," said Cristian Gladdish, from Canterbury, brandishing an inflatable World War Two Spitfire. Yahoo news.

Cwpan y Byd 2006 yn y Varisty, AberystwythEr nad oeddwn i wedi trefnu'r peth mewn gwirionedd fe ges i fy hun yn gwylio gêm agoriadol Cwpan y Byd 2006 yn nhafarn Varsity gyda RO. Roedd y lle yn weddol wag a doedd dim rhyw awyrgylch cynhyrfus iawn yno. Ond wrth i Costa Rica bwyso ar phwyso ar yr Almaen fe ddaeth hi'n amlwg nad oedd llawer iawn o ffrindiau'r Almaen yn y lle. Cefnogwyr Lloegr oedd yno ac roedden nhw'n dechrau mwynhau beth oedd yn digwydd. Yna fe ddaeth pedwar Cymro i mewn ac fe ddechreuodd pethau newid. Nawr roedd 'na gefnogwyr gan yr Almaenwyr a'u symudiadau a'u hymdrechion yn cael eu cymeradwyo gan y Cymry. Wrth iddi ddod yn amlwg fod yr Almaen yn mynd i drechu fe dawelodd y cefnogwyr Lloegr ond roedd hi'n amlwg fod y Cymry yn hapus iawn gyda'r canlyniad. Yn bersonol roeddwn yn cael fy nhynnu y ddwy ffordd ac heblaw am y sefyllfa lle'r oeddwn i mae'n debyg y byddwn i wedi bod yn gweiddi dros Gosta Rica hefyd - dwi wastad am weld y timau bach yn cael y gorau ar y timau mawr, a does dim llawer o dimoedd sy'n fwy na'r Almaen. Ac eto roedd y rhaniad rhwng cefnogwyr Cymru a chefnogwyr Lloegr wedi'n gwthio ni i'r hyn a fyddai fel arfer i'r gwrthwyneb i'n hegwyddorion arferol. Rhyfedd, a hithau ond yn ddiwrnod cyntaf Cwpan y Byd! Pwy a ŵyr na fydd pethau rhyfeddach yn digwydd cyn bo hir.

FBL-WC2006-MATCH01-GER-CRC-JUBO

Rhagor o luniau o Gwpan y Byd 2006 yn Varisty, Aberystwyth.

Tagiau Technorati: | | .

Cymylau tywyll uwch Stryd y Castell, Aberystwyth

Cymylau tywyll uwch Stryd y Castell, Aberystwyth

Pan welais i'r cymylau tywyll hyn neithiwr a'r golau yn Stryd y Castell roedd yn rhaid imi dynnu llun. Dwi'n gobeithio'n fawr iawn y byddan nhw'n parhau yn gymylau llythrennol.

Tagiau Technorati: .